By zunjarbharat@gmail.com 
मुधोजी महाविद्यालयात रसायनशास्त्राच्या सुधारित अभ्यासक्रमावर एकदिवसीय कार्यशाळा उत्साहात संपन्न
फलटण : फलटण एज्युकेशन सोसायटीच्या मुधोजी महाविद्यालयातील रसायनशास्त्र विभाग व IQAC यांच्या संयुक्त विद्यमाने बी.एस्सी. भाग-३, सेमिस्टर-६ रसायनशास्त्राच्या NEP-2020 सुधारित अभ्यासक्रमावर एकदिवसीय कार्यशाळेचे आयोजन दि. २४ ऑगस्ट २०२६ रोजी शिवाजी विद्यापीठ, कोल्हापूर यांच्या प्रायोजकत्वाखाली करण्यात आले.
कार्यशाळेचे उद्घाटन मुधोजी महाविद्यालयाच्या सभागृहात झाले. यावेळी प्रमुख पाहुणे म्हणून शिवाजी विद्यापीठाच्या विज्ञान शाखेचे प्रमुख माननीय प्रा. (डॉ.) आर. व्ही. गुरव उपस्थित होते. तसेच प्रा. (डॉ.) आर. के. माने, I/C, BOS अध्यक्ष व रसायनशास्त्र विभागप्रमुख, के.आर.बी.पी. महाविद्यालय, इस्लामपूर यांची प्रमुख उपस्थिती होती. महाविद्यालयाचे प्राचार्य प्रा. (डॉ.) पी. एच. कदम यांनी अध्यक्षीय मनोगत व्यक्त केले. IQAC समन्वयक प्रा. (डॉ.) टी. पी. शिंदे यांचीही विशेष उपस्थिती होती. कार्यशाळेचे प्रास्ताविक व प्रमुख पाहुण्यांचा परिचय प्रा. (डॉ.) ए. पी. आचार्य, संयोजक व रसायनशास्त्र विभागप्रमुख यांनी करून दिला.
यावेळी प्रमुख पाहुणे प्रा. (डॉ.) आर. व्ही. गुरव यांनी NEP-2020 अंतर्गत सुधारित अभ्यासक्रमाची प्रभावी अंमलबजावणी, अध्यापन-अधिगम प्रक्रियेत अपेक्षित सकारात्मक बदल, तसेच उच्च शिक्षणातील विद्यार्थी-केंद्रित, बहुविषयक, कौशल्याधारित, क्षमता-विकासात्मक व परिणामाधारित दृष्टिकोन याविषयी मार्गदर्शन केले. महाविद्यालयाचे प्राचार्य प्रा. (डॉ.) पी. एच. कदम यांनी अध्यक्षीय मार्गदर्शन करताना NEP-2020 मधील मूलभूत तत्त्वांचा अभ्यासक्रमरचनेत प्रभावीपणे समावेश करून उच्च शिक्षणाची गुणवत्ता, उपयुक्तता आणि परिणामकारकता वाढविण्याची आवश्यकता व्यक्त केली.
कार्यशाळेत सेंद्रिय, असेंद्रिय आणि भौतिक रसायनशास्त्र या विषयांवर स्वतंत्र सत्रांचे आयोजन करण्यात आले. सेंद्रिय रसायनशास्त्रासाठी प्रा. (डॉ.) एस. एम. खोत, असेंद्रिय रसायनशास्त्रासाठी प्रा. (डॉ.) एस. एच. बुगले आणि भौतिक रसायनशास्त्रासाठी प्रा. (डॉ.) ए. आर. सुपले यांनी मार्गदर्शन केले. दुपारच्या सत्रात भारतीय ज्ञान प्रणाली (IKS), कौशल्य वृद्धी अभ्यासक्रम (SEC) आणि क्षेत्रीय प्रकल्प (FP) यावर मार्गदर्शन व चर्चा झाली. प्रा. (डॉ.) जी. एच. निकम यांनी IKS विषयावर मार्गदर्शन केले, तर SEC व FP संदर्भात सविस्तर चर्चा करण्यात आली.
कार्यशाळेच्या समारोप सत्रात सहभागी प्राध्यापकांचा अभिप्राय घेण्यात आला व प्रमाणपत्रांचे वितरण करण्यात आले. समारोप कार्यक्रमाच्या अध्यक्षस्थानी महाविद्यालयाचे प्राचार्य प्रा. (डॉ.) पी. एच. कदम होते. डॉ. एम. पी. पाटील यांनी आभार मानले, तर श्रीमती जे. एस. काळेल व डॉ. चव्हाण मॅडम यांनी सूत्रसंचालन केले.
या कार्यशाळेस शिवाजी विद्यापीठाअंतर्गत विविध महाविद्यालयांतील सुमारे १०० प्राध्यापकांनी सहभाग घेतला. कार्यशाळा यशस्वी करण्यासाठी मुधोजी महाविद्यालयातील रसायनशास्त्र विभागातील सर्व शिक्षक व शिक्षकेतर कर्मचाऱ्यांनी विशेष सहकार्य केले. NEP-2020 अंतर्गत रसायनशास्त्राच्या सुधारित अभ्यासक्रमाच्या प्रभावी अंमलबजावणीसाठी ही कार्यशाळा निश्चितच उपयुक्त ठरली, असा सूर सहभागी प्राध्यापकांनी व्यक्त केला.
— ॲड. राजू भोसले
संपादक, साप्ताहिक झुंजार भारत (सातारा)